Ísland gangi Noregskonungi á hönd

Ég hef oft haldið því fram, alls ekki bara í gríni, að Íslendingar ættu að ganga Noregskonungi á hönd. Þau kynni sem ég hef haft af Norðmönnum og Noregi hafa sannfært mig um þetta, auk þeirrar langvinnu fullvissu minnar að það sé eitthvað í grundvallaratriðum bilað í íslensku samfélagi.           

Nú hefur það síðarnefnda komið heiftarlega á daginn. Við einfaldlega kunnum ekki að höndla frelsið. Við kunnum okkur ekki hóf. Því til sönnunar blasir við smátt og stórt: Bílarnir okkar og bankarnir. Hvort tveggja vaxið okkur svo ævintýralega yfir höfuð að helst minnir á skrípamynd. Enda erum við orðin aðhlátursefni á alþjóðavettvangi og rúin ærunni, eins og glöggt kom í ljós þegar Japanar hættu við að bjóða Sinfóníuhljómsveitinni í heimsókn.

Dapurlegt hvað það blasir við að Ísland er núna í hlutverki keisarans sem sprangaði um nakinn af því að hann lét svikahrappa plata sig. En þetta hefur einhvernveginn alltaf verið hlutskipti Íslendinga. Við erum heimsþorpsfíflið, þótt við séum kannski fyrst núna að gera okkur grein fyrir því sjálf. Eina góða er, að við gleymum því líklega ekki í bráð.           

Þegar fram líða stundir munu festast í erlendum tungum máltæki byggð á skírskotun í íslenskt stórmennskubrjálæði, svona eins og til eru orðtök um “þýska stálið” og “enska séntilmanninn.” Við þetta mun bætast “íslenska drambið.”           

Þrátt fyrir þetta eigum við góða að, og Norðmenn líklega þar fremsta í flokki. Þórólfur Matthíasson hagfræðiprófessor sagði nýlega í viðtali við norskan fréttavef að það sé praktískara fyrir okkur, til skemmri tíma litið, að taka upp einhverskonar myntsamstarf við Noreg, og þar með norsku krónuna, en að halda inn í Evrópusambandið og taka upp evru, þótt það hljóti að vera langtímamarkmið. Seðlabanki Íslands verði einfaldlega gerður að deild í norska seðlabankanum.           

Ég legg til að við göngum enn lengra, og gerum Ísland að fylki í Noregi. Það er leið til að bjarga bæði efnahag okkar og mannorði. Við einfaldlega lýsum því yfir að tilraunin Ísland hafi mistekist. Við klúðruðum henni.           

Mér er nokk sama þótt efnahagsundrið Ísland hafi reynst vera eins og nýju fötin keisarans. Mér er líka alveg sama þótt útlendingum finnist við hallærisleg. Mér hefur hvort eð er alltaf fundist Ísland hallærislegt og oft skammast mín fyrir stærilæti íslenskra ráðamanna erlendis. En ég verð að viðurkenna að mér finnst mjög dapurlegt að sjá fram á að þurfa að kenna börnunum mínum að skammast sín fyrir að vera Íslendingar.

Athugasemdir

[Sveinbjörn Kristinn Þorkelsson, 18.10.2008 kl. 14:18]

Takk fyrir "hugvekjuna" - hugrekki skortir þig ekki!

[Kristján G. Arngrímsson, 18.10.2008 kl. 14:33]

Takk. En ég held nú að það þurfi ekki mikið hugrekki til að vera með svona hyperbólur um þessar mundir. Annar hver maður lætur hvína í sér, og margur tekur dýpra í árinni en þetta. Aðalmálið er þó, að það er ekki bara við "útrásarvíkingana" að sakast. Þetta er þjóðarklúður. Hvað heitir "collective guilt" á íslensku?

[Jón Finnbogason, 18.10.2008 kl. 15:01]

Ætli þetta kallist ekki að vera samsekur.

[Rut Sumarliðadóttir, 18.10.2008 kl. 15:21]

Kristján, ég er alsaklaus af þessu klúðri, tók aldrei þátt. Hins vegar finnst mér Noregspælingin góð.

Samfélagssekt? Samfélagsleg sekt?

[Kristján G. Arngrímsson, 18.10.2008 kl. 15:51]

Samfélagssekt, já það hljómar vel. Takk.

[Magnús Sigurðsson, 18.10.2008 kl. 16:32]

Mér dettur einhvern veginn í hug Sturlungasaga.  Getum við valið um í hvaða landi við viljum vera fylki?

[Kristján G. Arngrímsson, 18.10.2008 kl. 16:42]

Tæknilega er áreiðanlega ekki meira mál að sameina lönd en að sundra þeim. Það þarf bara hugmyndaflug, pólitískan vilja og samþykki beggja þjóða. Líklega er þó raunhæfari kostur að við göngum í ESB, sem vonandi verður sem fyrst. Og svo þurfa íslenskir ráðamenn að hætta þessu hallærislega bulli um víkingaeðli þjóðarinnar. Þeir láta eins og við séum í barnaafmæli með víkingaþema.

[Helgi Már Barðason, 18.10.2008 kl. 17:53]

Það gæti reynst varasamt að ganga Noregskonungi á hönd. Síðast þegar við gerðum það lentum við undir Dönum áður en langt um leið og í svoleiðis klípu vilja sjálfsagt fáir komast aftur ...

Gaman að lesa skrifin þín, vinur sæll - keep up the good work.

[Magnús Sigurðsson, 18.10.2008 kl. 18:02]

Samála um að það þarf að skoða alla möguleika.  Hvort einhver vill taka við pakkanum Ísland verður að koma í ljós.  Allavega eru tímaglasið runnið hjá núverandi valdhöfum á Ísland.  Verst hvað þeim gengur illa að átta sig á því.

[Jón V Viðarsson, 18.10.2008 kl. 18:20]

Við eigum að efla samstarfið við Rússa og Norðmenn. Fá Rússana til að bora eftir olíu með því skilyrði að þeir fái 30% af því sem finnst á svæðinu ,leifa þeim jafnframt að byggja olíuhreynsistöðina sem skapar um 500 störf og þar væru þeir með þirlur og fl sem við gætum nýtt okkur við hjálparstörf og fl. Ísland og Norðmenn væru svo með sameiginlega fiskmarkaði og útfluttnig. Norðmenn gætu hjálpað okkur að setja upp öflugt þorskeldi og svona mætti lengi telja.

Síðan á að setja upp nokkur netþjónabú og dæla þannig inn gjaldeyri frá Mikrosoft og fleirri tölvurisum. ESB löndin vilja ólm komast í þessar auðlyndir hjá okkur en við skulum ekki láta þá komast upp með það.

[Kristján G. Arngrímsson, 18.10.2008 kl. 18:39]

Já, kannski væri einhverskonar norðurslóðabandalag betra en Evrópusamband. Mætti höfða til Kanadamanna líka, að veita okkur aðstoð, á þeim forsendum að við séum norðurslóðaland, líkt og þeir. Þeir gera líka tilkall til norðurpólsins, líkt og Rússar, þannig að þeim ætti að vera akkur í að hjálpa okkur og koma þannig í veg fyrir að Rússar seilist hér til áhrifa.

[Elías Theódórsson, 18.10.2008 kl. 19:36]

Allt betra en ESB. ESB hefur nú ekki reynst okkur vel í núverandi vandræðum.

Ég vona að enn séu til Íslandingar sem vilja vera sjálfstæðir og búa í sjálfstæðu Íslandi. Ekki gefast upp þótt á móti blási.

[Kristján G. Arngrímsson, 18.10.2008 kl. 19:55]

Hafa ekki atburðir undanfarinna ára og nú síðustu vikna einmitt sýnt, að við ráðum ekki við að vera frjáls? Ég held það. Að vera frjáls er ekki bara fólgið í digurbarkalegum yfirlýsingum. 

Við þurfum aðstoð við að þroskast sem þjóð og samfélag, og getum leitað hennar hjá þeim sem eru reyndari, eldri og kunna betur að sníða sér stakk eftir vexti. Því það kunnum við svo sannarlega ekki, það hefur bankakreppan leitt í ljós!

[Linda, 18.10.2008 kl. 21:35]

Vá maður, hverslags uppgjafar tal er þetta.  Við erum Íslendingar og við gefumst ekki upp.  Norssarnir eru flottir vinir, en lengra skal það aldrei fara. 

Áfram Island, tími kominn til að loka okkur af, laga til og opna aftur eftir 5 ár. ;)

bk.

[Magnús Vignir Árnason, 18.10.2008 kl. 23:11]

Einhverra hluta vegna lýst mér best á hugmyndina að við spilum næstu 5 til 10 árin á þau hljóðfæri sem til eru þ.e. að spara og afla tekna, já bara taka á því næstu árin, það myndi kenna okkur best. Taka ekki meiri lán en við nauðsinlega þurfum og þá með sem minnstum skilyrðum. Ég er logandi hræddur við ákvarðanir um ESB aðild, rússahjálp. noregssameiningu og þess háttar ákvarðanir, teknar í geðshræringu og fljótfærni þegar ástandið er eins og það er núna. Það er nefnilega ekki svo auðveldlega aftur snúið.

Takk fyrir góð skrif  

[Kristján G. Arngrímsson, 18.10.2008 kl. 23:35]

Ég skil þig vel, Magnús.

En núna óttast ég orðið meira hvað muni gerast ef íslenskir "snillingar" verða aftur látnir ráða ferðinni. Það er komið á daginn, að þessir meintu vitringar - sem allir vissulega töldu þá vera - vissu í rauninni ekkert hvað þeir voru að gera.

Þetta voru bara strákar með ofvaxið sjálfsálit og dollaramerki í augunum. Í rauninni jafn miklir bjánar og mér finnst ég sjálfur vera. Eini munurinn á mér og þeim var sá, að þeir voru frekir og heimtuðu að fá að ráða.

Það er því bara á einhverjum "betri er krókur en kelda" forsendum sem ég vil að einhverjir aðrir en Íslendingar verði fengnir til að ráða hér ferðinni. Sem betur fer er búið að kalla til IMF. Það er strax skárra en stjórn Seðlabankans.

[Heidi Strand, 19.10.2008 kl. 00:12]

Mér list líka vel á Noregshugmyndin. Við höfum margt sameiginlegt og með stórasta landhelgi.
Íslenska þjóðin getur ekki gengið um að skammast sin fyrir flottheitin, blekkingin og hrunið.
Þið eigið bara að bera höfuðið hátt.
í gamla daga læddist fjölskyldan sér meðfram veggjum, ef alkolisti var í fjölskyldunni, en það er liðin tíð.

[Magnús Vignir Árnason, 19.10.2008 kl. 00:16]

Það er allt betra en stjórn Seðlabankans.

Við erum alveg sömu bjánarni og "útrásarvíkingarnir". Munurinn á þeim og okkur er sá að við gerum okkur grein fyrir því.  

[jonsson 19.10.2008 kl. 10:11]

mér finnst þetta mjög gott innlegg hjá þér Kristján.  tek undir með þér að verða fylki í Norge.  greinilegt að Íslendingar hafa ekki getu til að halda traust og gott þjóðfélag sjálfir.  - en veltum upp öðrum fleti á þessum málum.  er ekki ástæða að ræða um að hækka aldursmörk til að kjósa til þings ?  einhverja hluta vegna hefur stjórnkerfið brugðist og leitt okkur í þessa hnípnu stöðu.  við erum búin að ala upp aldurshópa sem hafa séð þessa undanfarina þróun sem hina einu réttu og önnur gildi hafa mátt sín lítils.  þarna er menntakerfið okkar mjög ÁBYRGT.  drögum hvergi úr þeirri ábyrgð !!!   svo skrítið sem það er, þá er eins og fyrir nokkrum árum þegar fólk hafði ekki aðgengi að öllum þessum upplýsingum úr blöðum og öðrum miðlum,  þá þurfti fólk að drekka í sig fróðleikinn til að vita meira.  nú á seinni tímum lítur út fyrir að mikið upplýsingaflæði bjóði samt uppá þrengri fókus sem fólkið tekur eftir.  - getur verið að við séum með lélega blaðamenn ??  getur verið að við séum með alltof margt fólk sem er að skrifa bara um bull og vitleysu um dægurhluti sem engumáli skipta.  getur verið að blaðamennirnir okkar hafi í gegnum árin verið svoddan raggeitur að hafa ekki þorað að fjalla um hvað hefur verið að gerast í fjármálaheiminum og stjórnmálunum síðustu 10 til 20 árin ?  getur verið að blaðamennirnir okkar hafi bara alls ekki haft þroska, yfirsýn eða yfirleitt getu til að standa sig í starfi ??

[The outlaw 19.10.2008 kl. 11:03]

Afhverju ættu Normenn ad taka upp samstarf med okkur ? Öll umrædan er eins Normenn hafi thegar bankad uppa. Höfum vid eithvad uppa ad bjoda ?

[Kristján G. Arngrímsson, 19.10.2008 kl. 11:22]

Nei, það er auðvitað ekki sjálfgefið að Norðmenn taki okkur fagnandi. Því ættu þeir að gera það? En ESB hefur boðið okkur velkomin.

Varðandi fréttamenn og meint hugleysi þeirra held ég að það hafi verið misjafnt frá einum til annars. Sumir sleiktu skóna á auðmönnunum sem áttu miðlana, aðrir voru með kjaft og fengu bágt fyrir.

[Þórhallur, 19.10.2008 kl. 11:36]

Mjög gott innlegg. Ég neita því algerlega að eiga einhvern þátt í þessu klúðri. Ég kaus ekki þessa flokka, ég á engin hlutabréf, hef ekki staðið í neinni útrás. Þar sem ég treysti ENGUM stjórnmálamanni á Íslandi um þessar mundir finnst mér mjög góð hugmynd að ísland verði sett undir annað land. Það gæti verið hvort sem er Noregur eða Danmörk, eða jafnvel Færeyjar. Þeir standa sig mun betur en íslensku stjórnmálamennirnir, þrátt fyrir klúðrið þarna um árið í Færeyjum.

[Guðbjörn Guðbjörnsson, 19.10.2008 kl. 11:48]

Ég kannast ekki við neina sök í þessu máli!

Ég vinn hjá ríkinu og hef það - ef eitthvað er - verra, en árið 2001-2002, þegar útrásin byrjaði! Ég held reyndar, að 95% Íslendinga hafi lítið sem ekkert hagnast af þessari útrás.

Ég er ekki með neinar raðgreiðslur í gangi og hef til þessa átt fyrir mínum afborgunum um hver mánaðarmót og rúmlega það. Ég staðgreiddi flatskjáinn, AEG þvottavélina og þurrkarann og þau húsgögn og innanstokksmuni, sem ég hef keypt undanfarin 5-6 ár.

Líkt og fólk gerir erlendis - hvort sem það er í Noregi, Þýskalandi eða í Bandaríkjunum - keypti ég mér bíl, sem ég réði vel við afborganirnar af. Samkvæmt ráðleggingum bankans tók ég myntkörfubílalán. Nú borga ég 95.000 kr. í stað 50.000 kr. Ég lít á mig frekar sem þolanda í þessu máli og aðrir eru gerendur, þótt ég axli fulla ábyrgð á gjörðum mínum með því að borga lánið áfram.

Líkt og fólk gerir erlendis - hvort sem það er í Noregi, Þýskalandi eða í Bandaríkjunum - keypti ég mér hús fyrir 5 árum á viðráðanlegu verði og átti í því 60%. Sökum verðtryggingar á ég núna 40% í húsinu og lánið hefur hækkað úr 17 milljónum í 20 milljónir og greiðslubyrðin hefur hækkað að sama skapi.

Getur einhver bent mér á hvað ég gerði rangt! Átti ég - öfugt við allar aðrar þjóðir - að safna fyrir húsinu og kaupa það um sextugt, þegar börnin eru orðin stór? Bíllinn dugar í 7-10 ár og ég tók lán til 7 ára og leit á bílalánið, sem hálfgerðan leigusamning og síðan þyrfti ég auðvitað að borga eðlilega vexti fyrir afnot af fjármagni til þess sem á það. Var þetta rangt hugsað hjá mér?

Líkt og þúsundir annarra Íslendinga vil ég bara venjulegt viðburðalítið líf, þar sem ég veit nokkurn veginn, hvaðan á mig stendur veðrið og verðið hverju sinni.

Þess vegna vil ég skoða ESB aðild, en ekki aðild að norska konungsríkinu. Ég vil taka skýrt fram, að ég hef ekkert á móti Noregi og er meira að segja frekar hlýtt til Haralds.

[Þorsteinn Siglaugsson, 19.10.2008 kl. 12:13]

Ísland hefur þrisvar verið sjálfstætt. Fyrst frá landnámi og til 1262. Því skeiði lyktaði þannig að þegar yfirstéttin hafði nær murkað lífið úr sjálfri sér í langvinnu borgarastríði tók Noregskonungur við stjórninni. Næsta skeið stóð í 30 ár, frá 1918 og fram að síðari heimsstyrjöld. Þessu skeiði lauk með hernámi Breta og síðan tók við langvinn herseta Bandaríkjamanna, sem tryggðu þjóðinni bærileg lífskjör í skiptum fyrir áhrifasvæði. Þriðja tímabilið hófst þegar Bandaríkjamenn drógu herafla sinn út úr landinu upp úr síðustu aldamótum. Allir vita hvernig því lyktaði.

Kannski hugmyndin um sjálfstæði Íslands sé aðeins blekking?

[Kristján G. Arngrímsson, 19.10.2008 kl. 12:24]

Þakka þér fyrir athugasemdina þína, Guðbjörn. Hún er virkilega góð.

Þetta með aðild að Noregi var einsog ég nefndi, kannski bara hyperbóla, en hinn raunverulegi möguleiki er, líkt og þú nefnir, ESB-aðild og evra. Það hlýtur að verða ofan á núna.

Ég held að Þórhallur tjái sentíment margra, amk. mitt, þegar hann segir að það sé erfitt að treysta nokkrum og því er það neyðarbrauð að fá utanaðkomandi stjórn hingað.

Líkt og Guðbjörn vil ég venjulegt og viðburðalítið líf, vegna þess að slíkt líf er forsenda þess að maður geti notið samvista við ástvini sína, og það er lykillinn að hamingjunni.

En líklega áttum við að rífa meira kjaft en við gerðum, voga okkur að hafna kjaftæðinu sem fjölmiðlarnir og þjóðarleiðtogarnir báru sífellt á borð fyrir okkur um alla þessa stórkostlegu útrásarvíkinga.

Við áttum að hafna þessum fréttaflutningi, og áttum að vera á varðbergi gagnvart því, að fara að halda að þetta hlyti að vera merkilegt af því að þetta var alltaf í fréttum.

Það voru ekki bara Seðlabankinn og FME sem brugðust í eftirlitshlutverkum sínum, fjölmiðlar brugðust líka. Nema kannski síst Ríkisútvarpið, enda var það orðið eini fjölmiðill landsins sem ekki heyrði undir einhvern útrásarvíking.

[Kristján G. Arngrímsson, 19.10.2008 kl. 12:31]

Já Þorsteinn, það skyldi þó ekki vera að þú hafir hitt naglann á höfuðið? Flott Íslandssögugreining!

Meint sjálfstæði Íslands er kannski aðallega í kjaftinum á okkur.

[Johann Trast Palmason, 19.10.2008 kl. 12:40]

Hvað með Kanada ? og komast svo þannig inni sameiginlegan gjaldmiðil kanada, bna og mexico innann nokkra ára ? ég er að tala um ameruna sem þeir stefna á.

[Kristján G. Arngrímsson, 19.10.2008 kl. 12:48]

Kanada er náttúrulega besta land í heimi. Ég þekki það af eigin raun.

[Guðbjörn Guðbjörnsson, 19.10.2008 kl. 13:05]

Ég hef aldrei búið í Kanda að Bandaríkjunum, heldur í Þýskalandi og Sviss í 12 ár og finnst við einhvernveginn vera meiri Evrópuþjóð.

Já, flott hjá Þorsteini og skemmtileg þetta með 1944 til brottfarar hersins árið 2006. Hef aldrei séð þetta svona, en það er sannleikskorn í þessu, sérstaklega ef við horfum til þess hversu einir og yfirgefnir við erum í samfélagi þjóðanna þessa dagana.

Ég held að við, sem viljum leita hjálpar hjá ESB, séum einfaldlega komin lengra í ferlinu en annað fólk og að þrýstingurinn til aðildar eigi aðeins eftir að aukast.

Við eigum virkilega enga vini og þjóð, sem telur 320.000 manns verður hreinlega að eiga góða vini, sem  hún getur treyst og trúað fyrir öryggi sínu í víðum skilningi þess orðs.

[Bjarne Örn Hansen 19.10.2008 kl. 13:36]

Það væri svo sem eftir Íslendingum að skipta á einni vitleysunni fyrir aðra. Noregur á við mikinn vanda að stríða, þegar fjármál eru annars vegar og er óreiða þeirra bjargað með olíulyndunum.  Laun þar eru há, en dýrtíð mikil.  Norðmenn koma mikið hingað yfir, bæði til að versla og búa. Þeir hér, sem vinna hinum megin landamæranna, taka með sér vagn og mat, því annars myndi það ekki borga sig fyrir þá.

Væri nú ekki nær að halda frelsinu, og gerast aðili að Evrópusambandinu á eigin skilmálum. Að vísu hafa bandaríkjamenn best tryggt Íslendingum lífsskilyrðin, en vafasamt að samband yfir á þá hlið myndi vera raunhæf lausn ef viðskiptasambandi yfir norður atlandshafið sviki, sem það og gerir fyrr eða síðar.

[Hafdís Eygló Jónsdóttir 19.10.2008 kl. 17:23]

Já þú ert til í það? Ísland var víst undir stjórn Noregs allt til ársins 1387. Hákon 6. í Noregi féll frá 1387 og þá fóru Noregur og fylgilönd undir danskan þjóðhöfðingja. Ég kýs frekar Dani :-)

[Fellow royalist. 19.10.2008 kl. 17:38]

Orð í tíma töluð, ég hef nú reyndar, um nokkurn tíma talað fyrir því að koma landinu aftur fyrir hjá Dönum, en oftast við litlar undirtektir landsmanna.

Það lítur alls ekki illa út í mínum augum að koma okkur fyrir hjá norskum, ég hef alltaf kunnað afskaplega vel við mig þar.

Það hefur komið bersýnilega í ljós að þessir okkar "snillingar" hafa ekki beinlínis komið ár okkar vel fyrir borð í samfélagi þjóðana.

Kveðja úr Danska amtinu.

[Kristján G. Arngrímsson, 19.10.2008 kl. 18:40]

Það má vera að Norðmenn eigi í fjárhagsvandræðum, en viss er ég um að þau blikna við hlið þeirra vandræða sem Ísland á nú í. Við höfum áreiðanlega sett heimsmet - miðað við höfðatölu - í peningavandræðum.

Kannski væri betra að hafa það Dani, við höfum jú góða reynslu af þeim sem nýlenduherrum. (Allar sögurnar um maðkaða mjölið voru bara áróður sjálfstæðissinna). Og hvaða Íslendingur ætli væri ekki til í að Köben yrði aftur höfuðborgin okkar?

[A.L.F, 19.10.2008 kl. 20:30]

Tek undir með þér heilshugar, ættum að fara í samningsviðræður við Norðmenn og verða fylki í noregi. Við erum fyrir löngu búin að sanna það að efnishyggjan, ég um mig einstefnan og lengi mætti telja er of mikil á þessu skeri til þess að við séum fær um að stjórna okkur sjálf.

[jonsson 19.10.2008 kl. 23:45]

krakkar mínir, ég er að hugsa um hvernig verður áramótaræðan í ár ?  verður hún í anda liðinna ára eða bara sorgartónn.   í æsku var mér sagt að sígandi lukka sé best.  ég fæ ekki séð að þeim stjórnmálaflokkum sem setið hafa um kjötkatlana sé á nokkurn hátt treystandi til að sjá um okkar mál meir.  hvernig haldiði að litróf sjórnmálana muni verða eftir þessar hörmungar ?  getur verið að allt verði fyrirgefið eða um allsherjar turningu verði um að ræða.                                                                                                               á þessum tímum hugsa ég til þess fólks sem hafa haft horn í síðu bænda og þeirra framleiðslu.  nú sjáum við það klárt og kvitt hvernig getur farið fyrir þjóð sem ekki hugsar fram fyrir nefið á sér.  borgríkið Ísland þarf vissulega á að halda öflugum landbúnaði til að brauðfæða þjóðina við öll tækifæri. 

þeir hjá aftonposten í noregi sögðu að við hefðum mat til 3 til 5 vikna.   eftir að hafa upplifað þessar steypur,  og viðvaranir breta og dana og fleiri.....  þá hugsar maður sitt.  kannski er þetta ekki úr lausu lofti gripið hjá norska blaðinu.